Қарапайым ауыл тұрғыны ретінде еңбекпен күн көріп жүрген жұмысшы жандарға деген құрметімді білдіргім келеді. Ауылда өмір сүру – тек табиғатпен үндесу емес, ол – тынымсыз тірліктің, адал еңбектің жолы. Осы жолда маңдай терін аямай, елге қызмет етіп жүрген жұмысшы мамандар – біздің қоғамның шын тірегі.
Ауылдың жолын төсеп, жарығын жағып, техникасын жөндеп, тіршілігін тындырып жүрген жандар – үнсіз еңбек майданындағы нағыз батырлар. Оларсыз бір күн де алға жылжу жоқ. Осындай азаматтардың арқасында ауылымыз еңсесін тіктеп келеді.
Бізде жұмысшы болу – намыс пен адалдықтың белгісі. Қара жұмыстан қашпай, қайта шеберлігін арттырып жүрген жастарды көргенде, көңіл марқаяды. Бұл – еңбекке деген құрметтің, елге деген жанашырлықтың айқын көрінісі.
Қазір «жұмысшы» деген сөз – жай атау емес, ол – өмір салты. Олар күн сайын көзге көрінбейтін, бірақ аса қажет жұмысты атқарып жүр. Сондықтан да мұндай мамандарды қоғамда дәріптеу – ұрпаққа үлгі боларлық іс.
Жастардың көбі тек кеңсе жағалап кетпей, қолөнер мен техника, құрылыс пен шеберлік жолына бет бұрып жатса – бұл ел үшін үлкен олжа. Атадан қалған адал кәсіпті жалғастыру – нағыз азаматтың ісі деп білемін.
Р.Салауатов
Ауыл тұрғыны
