Республика көлемінде жүзеге асқан «Таза Қазақстан» экологиялық акциясының мақсаты – өзіміздің туып-өсіп, тұрып жатқан өңіріміздің тазалығын сақтау. Бұл жөнінде Мемлекет басшысы Қасым-Жомарт Кемелұлы Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында ерекше тоқталып өтті.
«Таза Қазақстан» шарасына өткен жылы бірнеше айдың ішінде 500-ге жуық азамат атсалысып, 1 мың тоннадан астам қоқыс жиналды. Махамбет ауылы Жайық жағалауындағы бөгет соғу кезінде кесілген ағаштардан толық тазартылды. «Жасыл белдеудің» ішіндегі қураған талдар кесіліп шығарылды. Ауылдық округке осы ағаштарды ұнтақтайтын агрегат сатып алынды. Махамбет және Сарытоғай ауылдарына 31 орынға қоқыс алаңшалары салынып, биылғы жылы 10 алаңша құрылысы басталып кетті. Олар Мөңкеұлы, Ақшолан, Шененов-2, Тайманов, Жұмабаев, Ахметжанов көшелері мен Сарытоғай ауылына 2-уі қондырылады. Махамбет ауылына тазалыққа байланысты 2 бильборд орнатылды.
Аталмыш акция аясында мекеме айналасындағы, саябақ, ойын алаңдарындағы, көше бойындағы шөптерді тазартып қыру, ауылдың ішін және сыртын, тас жол айналасы, жағалауларды тазалау жұмыстары жүргізілді. Әр мекеме, әр үй айналасын шөптерден тазалады. Жиналған шөптер және ағаштардың кесіндісі ауылдық округке қарасты мердігер мекеме «Жомартжан» ЖШС арқылы тракторлармен шығарылуда. Жайық жағасы кесілген ағаштардан тазартылды. Учаскелік полицейлермен рейдтер ұйымдастырылып, ҚР ӘҚБ-тың 505- бабы бойынша көшелеріне құрылыс материалдарын төккен тұрғындарға ескертулер беріліп, құрылыс материалдары алынуда. Айта кететін тағы бір жайт, қоқыс контейнерлеріне қоқыстарын жеткізбей төгу, контейнердің сыртына тастап кету фактілері азаймай отыр. Осы бойынша рейдтерде анықталып, 3 тұрғынға ескерту хаттамасы толтырылды. Онымен қоса ауыл ішінде сиыр малдарын бақыламай жіберу де, контейнер ішіндегі қалдықтардың шашылуына себеп болуда. Президентіміз Қ.Тоқаев «Таза Қазақстан» акциясының аймақтарда сапалы жүзеге асуына әкімдер тікелей жауапты екендігін, елге оның мән-маңызын түсіндіріп, жұмысты дұрыс үйлестіруі қажеттігін де тапсырды. Ол: «Әрбір басшы елмен етене жұмыс істеп, тұрғындармен сенімді байланыс орнатуы қажет. Сонда жұрт та оның бастамаларын қолдайды, ел үшін пайдалы іске жұмыла кіріседі. Әкімнің абырой- беделі дегеніміз де – осы» деді ол сөзінде.
Біз, әкімдер, тазалық науқанын ұйымдастырып, баршамыз бір кісідей жұмыла атсалыссақ, біраз шаруа ширап, ауданымыздың келбеті көркейе түсері сөзсіз. Әйтсе де, іс мұнымен бітпейді. Оны ластамау, өзгенің еңбегін бағалау елі мен жерін сүйетін әр тұрғынның жауапкершілігінде екендігін естен шығармайық. Мемлекет басшысы айтқандай, тазалық біздің қанымыз бен жанымызға сіңген қасиетке айналуы тиіс!
Нұрлан САПАРОВ,
Махамбет ауылдық округінің әкімі
