Қоғам дамуының негізінде еңбек тұр. Ал сол еңбектің ажырамас бөлігі – жұмысшы мамандықтары. Құрылысшылар, дәнекерлеушілер, механизаторлар, электриктер, наубайшылар мен тігіншілер – бұл кәсіп иелерінің еңбегі күнделікті өміріміздің ажырамас бөлігі.
Бүгінде жұмысшы мамандықтарына деген сұраныс артып келеді. Жаңа технологиялар енгізілгенімен, өндіріс орындары мен құрылыс алаңдарында, ауыл шаруашылығы мен қызмет көрсету саласында білікті жұмысшыларға деген қажеттілік ешқашан жойылмайды. Техниканы басқару, инфрақұрылымды күтіп-ұстау, халыққа қызмет көрсету – мұның барлығы адам еңбегінсіз мүмкін емес.
Алайда жұмысшы мамандықтарына қатысты қоғамда белгілі бір көзқарас қалыптасқан: жастар бұл салаға баруға құлықсыз, ал кейбір ата-аналар балаларын міндетті түрде жоғары білім алуға итермелейді. Бірақ бұл түсінік заман талабына сай өзгеруі керек. Жұмысшы мамандықтарының беделін көтеру – тек мемлекеттің ғана емес, қоғамның ортақ міндеті.
Мамандықтың жаманы жоқ, ең бастысы – өз ісіңе деген сүйіспеншілік пен адалдық. Еңбектің ешқайсысы артық немесе кем емес. Біз тұтынатын әрбір өнім, тұратын баспана, пайдаланып жүрген көлік пен техника – барлығы жұмысшы мамандардың маңдай терімен жасалған. Сондықтан олардың еңбегін бағалау – қоғамның дамуына қосылған үлес.
Жұмысшы мамандықтары – елдің экономикасы мен өркендеуінің тірегі. Оларға құрметпен қарау – біздің ортақ борышымыз.
Дина АХМЕТЖАНОВА,
ардагер ұстаз
