«TalpynUp» алты айлық тәлімгерлік бағдарламасы – бұл Imperial College London (Ұлыбритания) профессорлары мен Бизнес-тренерлер қауымдастығының (Қазақстан) бірлескен жобасы, деп хабарлайды AtyrauPress тілшісі.
ОКҚ алаңында өткен баспасөз конференциясында жобаны ұйымдастырушы жаңа пилоттық жоба және жалпы әйелдер кәсіпкерлігінің дамуы туралы айтып берді.
Британдық сарапшылар, Imperial College London профессорлары Мишель Роган мен Анне Тер бүкіл әлемде әйелдер ұқсас кедергілерге тап болатынын және тәлімгерлік бағдарламалар оларға networking, яғни пайдалы байланыстар орнатуға көмектесетінін атап өтті. Әйелдер бизнесі, сарапшылар атап өткендей, әрқашан бәсекелестіктен гөрі ынтымақтастыққа негізделген.
«McKinsey Global Institute есебіне сәйкес, әйелдердің экономикалық қатысуы ерлермен тең болатын сценарийді жүзеге асыру 2025 жылға қарай жыл сайынғы әлемдік ЖІӨ-нің 28 трлн долларға (26%) өсуіне әкелуі мүмкін. Біздің еліміз туралы айтар болсақ, ҚР Ұлттық экономика министрлігінің деректері бойынша республиканың ЖІӨ-дегі ШОБ үлесінің өсуі 10 жылда 16% құрап, 2022 жылы 33,5%-ға жеткен. Қазақстанның шағын және орта бизнесімен айналысатындардың 31%-ы немесе 1 миллионы әйелдер», – деді Бизнес-тренерлер қауымдастығының басшысы Әйгерім Тарбағатаева.
Сондай-ақ ол ДЭФ-тің «Жұмыс орындарының болашағы 2023» есебіне сәйкес, жұмыс орындарының 23%-ы 2027 жылға қарай өзгеретінін атап өтті. Ең көп қысқартулар әкімшілік позициялар мен дәстүрлі кәсіптер бойынша болады деп күтілуде. Ал жұмыс істейтін әйелдер еңбек нарығының өзгеруіне байланысты жиі зардап шегеді, өйткені көпшілігі қызмет көрсету және денсаулық сақтау саласындағы әкімшілік жұмыстармен айналысады.
«Әйелдер кәсіпкерлігін және әйелдерді дамыту аясында Қауымдастықта «Әйелдердің даму клубы» ашылды, онда біз тегін негізде түрлі форматта оқытулар өткіземіз. Сондай-ақ қазан айында Imperial College London-мен бірлесіп әйелдер бизнес-дағдылары мен өз бизнесінің жағдайын жақсартуы үшін «TalpynUp» алты айлық тәлімгерлік бағдарламасы басталады», – деді Әйгерім Тарбағатаева.
