Каспий теңізінің қазақстандық секторындағы «Қашаған» кен орнынан өндірілген мұнай 115 млн тоннадан асты. Бұл – 2016 жылдан бері алынған өнім, деп жазады Egemen.kz.
Солтүстік Каспий жобасының операторы – «Норт Каспиан Оперейтинг Компани Н.В.» (NCOC) компаниясының басқарушы директоры Джанкарло Руюдің айтуынша, кен орнындағы жұмыс қауіпсіз жүргізіліп жатыр.
«Каспий теңізіндегі «Қашаған» кен орны іске қосылғаннан бері 115 миллион тоннадан астам мұнай, 70 миллиард текше метрден аса газ, 10 миллион тоннадан артық күкірт өндірілді. Кен орнын игеру кезінде ауыр жарақаттар мен оқыс оқиғалар тіркелген жоқ. Жергілікті тауарлар, түрлі жұмыстар мен көрсетілетін қызметтерге шамамен 18 миллиард доллар жұмсалды. Ал былтыр бұл мақсатқа жұмсалған қаржы шамамен 1 миллиард долларды құрады», дейді Джанкарло Рую.
