«Доссормұнайгаз» МГӨБ-ның энергетика бөлімінің басшысы Жұмабай Абдулов білікті де білімді мамандарды тәрбиелеп, сауатты етіп шығаруға үлес қосып жүрген білікті ұстаз, білімді маман. Ол былтыр «Еңбек жолы» республикалық байқауына «Жұмысшы жастардың үздік тәлімгері» номинациясы бойынша қатысып, жүлделі III орын иеленген болатын.
«Республикалық конкурсқа бүкіл Қазақстан бойынша 179 үміткер қатысқан болатын. Олардың арасынан жүлделі үшінші орынға ие болдым. Бұл мен үшін зор мақтаныш. Осы көп жылдар бойы еңбек еткен кезімде жас буынды дайындап, еңбекке араластардым. Қатардағы электромонтер болып жұмыс жасап жүрген мамандар қазіргі кезде цех бастығы, мастер болып еңбек етіп жүр. Жастарды тәлімгерлікке баулуда көп еңбек етіп келеміз. Бар білгенімізді жеткізіп, жастарды тәрбилеуде, үйретуде шаршамаймыз және де алға қарай да жалғастыра береміз»,- дейді «Доссормұнайгаз» МГӨБ бөлім басшысы Жұмабай Абдулов.
Мақтаулы мұнайшы кейінгі ұрпақты мамандыққа баулудан, білгенін үйретуден шаршаған емес. Қазір Мақат мұнай және газ технологиялық колледжімен тығыз байланыста. «Электромеханикалық жабдықтарға техникалық қызмет көрсету, жөндеу және пайдалану» мамандығы бойынша жыл сайын мемлекеттік емтихан комиссиясына және өндірістік тәжірибеде студенттерге жетекшілік етеді. Колледждің материалдық-техникалық базасын нығайту мақсатында 2021 жылы «Жас маман» жобасы негізінде Жұмабай Нұрбайұлының айтуымен қажетті құрал-жабдық алынған. Нәтижесінде студенттер тек теориялық білім емес, тәжірибе де жинақтауда.
Жұмабай Абдулов 1964 жылы Доссор кентінде мұнайшылар отбасында дүниеге келген. Атырау қаласындағы Политехникалық институтын «Инженер-электрик» мамандығы бойынша аяқтап, еңбек жолын 1984 жылы «Доссормұнайгаз» мекемесінде қатардағы электромонтер болып бастайды. 39 жыл бір орында табан аудармастан қызмет атқарып келе жатқан ол осы бір жылдар аралығында өндірісте өзін жауапты, кәсіби маман ретінде көрсете білді. Жұмабай Абдулов былтыр «Ембімұнайгаз» АҚ-да «Жыл адамы» атанды.
Жас мамандар даярлап, ғасырлық тарих көшін алға жетелеп, компанияның даму стратегиясын жүзеге асыруда өз қолтаңбасын қалдыра білген Жұмабай Нұрбайұлының әлі де алға қойған жоспарлары көп.
М.ІЗТҰРҒАНОВА
#EnbekEri
