АТЫРАУ. KAZINFORM – Атырауда күзгі миграция кезінде сыбырлақ аққу ұша алмай қалған. Арнайы мамандар құсты тексеріп, табиғи ортаға жіберді.
Атырау облыстық орман шаруашылығы және жануарлар дүниесі инспекциясының ақпаратына сүйенсек, жергілікті тұрғын құстың ұша алмай қалған құс туралы хабар берген.
– Атырау қалалық әкімдігіне қарасты Алмалы ауылы тұрғынының айтуынша, аққуға ұқсас құс миграция кезінде қонып, қайта ұша алмай қалған. Осыған байланысты инспекция мамандары жедел жұмыс жүргізіп, құстың сыбырлақ аққудың жас дарағы екенін анықтады. Құста ешқандай жарақат та, басқа ауру түрі де жоқ, - деп хабарлады аталған инспекциядан.
Сыбырлақ аққуды табиғи ортасына жіберу жұмысын жүргізуге инспекциясының бас мамандары А.Маратұлы мен С.Мақу, «Ақжайық» мемлекеттік табиғи резерватының орнитологы И.Бофонов қатысқан.
Еске сала кетелік, бұған дейін Атырау облысында 84 киік өлгенін, бірақ еті сатылып жатпағанын жазған едік.
