Салтанатты рәсімге қала әкімі Шәкір Кейкін мен Сафи Өтебаев атындағы Атырау мұнай және газ университетінің ұжымы қатысты, - деп хабарлайды Өңірлік коммуникациялар қызметі.
Полигонда жер қойнауын барлаудан бастап мұнай өнімдерін өңдеуге дейінгі барлық өндірістік жұмыс атқарылады. Мұнда озық үлгідегі зертханалар, оқу-өндірістік алаңдар, тәжірибе жасауға арналған қондырғылар мен инновациялық шешімдерді тестілеу алаңдары қарастырылған.
- Соңғы үш жарым жыл бойы біз аянбай еңбек етіп, оқу-өндірістік полигон құруды мақсат еттік. Бүгінде осы мақсаттың алғашқы кезеңіне куә болып отырмыз. Бұл уақыт капсуласы біздің келешекке қалдырған аманатымыз, студенттердің болашақ буыны үшін жаңашылдыққа ұмтылуымыздың символы, - деді С.Өтебаев атындағы Атырау мұнай және газ университетінің ректоры Гүлзада Шакуликова.
Оқу полигоны келесі оқу жылы қолданысқа беріледі деп күтілуде. Айта кетейік, құрылыс жұмыстары «Ембімұнайгаз» компаниясының қолдауымен жүзеге асады.
