Серік Жұманғарин «Атамекеннің» ҚҚС-дан түсетін кіріс туралы есебіне жауап берді

Серік Жұманғарин «Атамекеннің» ҚҚС-дан түсетін кіріс туралы есебіне жауап берді
Фото: Виктор Федюнин / Kazinform
(0 Votes)

АСТАНА. KAZINFORM — Премьер-министрдің орынбасары — Ұлттық экономика министрі Серік Жұманғарин Мәжіліс отырысынан кейін өткен баспасөз мәслихатында «Атамекен» ұлттық кәсіпкерлер палатасының ҚҚС-ны өзгертуден түсетін кіріс туралы есебіне жауап берді. 

— «Атамекен» ұлттық кәсіпкерлер палатасы қосылған құн салығының межелерін өзгертуден бюджетке ары кетсе 3 трлн теңге ғана түседі деген есеп айтты. Ал Үкімет 4-5 трлн теңге түседі деп отыр. Ертең кәсіпкерлер палатасының есебі рас болып, қосымша кіріс 3 трлн теңге ғана болса, қалған 2 трлн теңгені тағы Ұлттық қордан аласыздар ма, — деп сұрады журналист.

Серік Жұманғарин «Атамекеннің» есебінен біраз қате табылғанын, кейін палата өкілдері Үкіметтің уәждерімен келіскенін айтты.

— Жалпы айтқанда, «Атамекеннің» есептегені — тек ҚҚС-дан түсетін ақша. Біздің есептегеніміз бүкіл салық реформасынан түсетін ақша болатын. Бұл реформада банктерге, ойын-сауық нысандарына қосымша жүктемелер бар. Оның сыртында көптеген жеңілдікті алып тастаймыз деп отырмыз. Соның бәрін есептегенде 4,5-5 трлн теңге қосымша кіріс болады. Менің білуімше, дәл қазір «Атамекен» мен біздің есебімізде ешқандай айырмашылық жоқ, — деді вице-премьер.

Ұлттық экономика министрі «Атамекен» ҰКП-ның бастапқы есебі кейін өзгертуге ұшырағанын айтты.

— «Атамекеннің» бірінші есебіне қарағанда, арасында қателіктер көп болды. Сосын біз оларды түзетіп, екінші есебін әкелгенде екі жақтың болжамы жақындады, — деді Серік Жұманғарин.

Еске салсақ, Атамекен» ұлттық кәсіпкерлер палатасының төралқа төрағасы Райымбек Баталов қосылған құн салығын көтеруден түсетін кірістің Үкімет күткендей көлемде болмауы мүмкін екенін айтқан еді.

ФОТОГАЛЕРЕЯ

Біріңғай мемлекеттік байланыс

AQPARATPRINT