Жұмысшы жылы аясында ерекше назар аударылуы тиіс мәселенің бірі – жұмысшы жастарды жан-жақты дамыту. Себебі қазіргі таңда өндірісте, құрылыс пен ауыл шаруашылығында еңбек етіп жүрген жастардың саны артқанымен, олардың кәсіби және тұлғалық дамуына арналған нақты бағдарламалар, жүйелі қолдау шаралары жеткілікті дәрежеде жолға қойылмаған.
Жұмысшы жастар – ел дамуының жаңа қозғаушы күші. Олар – тек қана еңбек күшін емес, жаңа технологияны меңгеріп, инновацияны енгізуге қабілетті буын. Сондықтан бұл санаттағы жастардың кәсіби біліктілігін арттыру, білімін жалғастыруға мүмкіндік жасау, мансаптық өсуге жол ашу – стратегиялық маңызды міндет.
Жұмысшы жастар көбіне орта арнаулы білім алып, еңбекке ерте араласады. Алайда көп жағдайда олардың әлеуеті толық ашылмайды. Кәсіпорындарда жастарға арналған менторлық жүйе, шеберлікті шыңдайтын курстар, тіпті жеке басының даму бағытында (қаржылық сауаттылық, көшбасшылық қабілет, коммуникация т.б.) оқыту құралдары қажет. Бұл – жұмысшы жасты тек еңбекке бейім емес, өмірге бейім азамат етіп тәрбиелеудің жолы.
Сонымен қатар, жұмысшы жастың әлеуметтік жағдайына да көңіл бөлінуі тиіс. Жайлы жатақхана, тұрақты көлік, лайықты жалақы мен еңбек жағдайы – жастарды осы салада ұстап қалудың басты тетігі. Әйтпесе, қабілетті жас жұмысшы өз орнын өзге салада немесе тіпті басқа елде іздейді.
Жұмысшы жылы – тек еңбек адамын ұлықтайтын жыл ғана емес, осы жолда жүрген жастарды табу, тәрбиелеу, қолдау жылы болуы керек. Біз бүгінгі жас жұмысшыға сенім артып, ертеңгі шебер маманды, өндіріс басшысы мен сала көшбасшысын тәрбиелеп отырмыз.
Мемлекет пен қоғам бірлесе отырып, жұмысшы жастар үшін нақты мүмкіндіктер картасын жасап, оларды еңбекке баулып қана қоймай, ертеңге сеніммен қарауға жол ашуы тиіс.
Нұрдәулет АТЕЛОВ
Исатай аудандық ішкі саясат және тілдерді дамыту бөлімінің “Жастар ресурстық орталығы” коммуналдық мемлекеттік мекемесінің басшысы
