Қоғамның діңгегі — еңбек, ал еңбектің иесі — жұмысшы. Жұмысшы мамандығы — жай ғана күнкөріс құралы емес, бұл — елдің ертеңіне қаланған нақты кірпіш.
Заводта темір кесіп тұрған адам да, жол салып жатқан құрылысшы да — мемлекеттің болашағын өз қолымен жасап жүрген тұлға.
Жұмысшы — ешқандай мінберге шықпай-ақ, ең үлкен құрметке лайық адам. Ол — қолымен істейді, бірақ жүрегімен сезінеді. Аспан астында тер төгіп, күннің көзінде де, жауын-шашында да тайсалмай еңбек ету — батылдықтың белгісі. Өйткені, жұмысшы болу — қарапайым көрінгенмен, рухани биік мамандық.
Қазіргі қоғамда технология, робот, жасанды интеллект жайлы көп айтылады. Бірақ оларды да жасайтын — жұмысшының қолы, шебердің ақылы. Нағыз дамыған ел — жұмысшысына лайықты жағдай жасап, еңбегін бағалаған мемлекет.
Сондықтан жұмысшы мамандығы — ол тек кәсіп емес, ол — намыс. Еңбек етуден арланбаған ұрпақ ешқашан ұтылмайды.
Анжела АТАНТАЕВА,
Ю.Гагарин атындағы орта мектебінің қазақ тілі мен әдебиеті пәнінің мұғалімі
Зинеден ауылы
