Елімізде қатардағы еңбеккерлердің жетістіктері еленбей жатады. Сондықтан қарапайым жұмысшы-қызметкердің мәртебесін көтеруді көздеген Мемлекет басшысы Қасым-Жомарт Тоқаев биылғы жылды «Жұмысшы мамандықтар жылы» деп жариялады. Сондай өз мамандығының майталманына айналған азаматтың бірі - жасынан еңбекке ерте араласқан Төлеген Машанов. Ол 1963 жылдың 21 ақпанында Қосшағыл ауылында туған. «Әке көрген оқ жонар, шеше көрген тон пішер» дегендей, өсе келе ата-анасының жолын қуып, белді бекем буған жас жігіт мұнайшы мамандығын таңдайды. Өйткені, әкесі Мағзұм кезінде Қосшағыл мұнай айдау станциясында аға тауар операторы қызметін атқарса, анасы да машинист лауазымында еңбек еткен еді. Сондықтан Қосшағылдағы Лермонтов атындағы №2 мектептен түлеп ұшқан ол қазіргі Атырау мұнай және газ институтына оқуға түсіп, мұнай және газ құбырларын, базалар мен қоймаларды салу және пайдалану мамандығында білім алып, бітіріп шығады.
Еңбек өтілін 1980 жылы сол кездегі Батыс Қазақстан мұнай құбырлары басқармасында қарапайым операторлықтан бастайды. Күні бүгін Құлсары мұнай құбырлары басқармасының Қосшағыл мұнай айдау станциясының аға операторы ретінде қызмет атқарып келеді. Осы жылдар ішінде өз мамандығының қыр-сырын жете меңгерген Төлеген Машанов – өз кәсібінің кәнігі шебері атанған азамат. Өзіне дейінгі алдыңғы толқын әріптес ағаларынан көргенін кейінгі іні толқынға үйретіп келе жатқан тәлімгер. Төлеген Мағзұмұлының өз мамандығына деген қызығушылығы мектеп кезіндегі станцияға жасалған экскурсиядан басталған екен. Оның үстіне, Ленин орденді майталман мұнайшы ұлының әке ізін жалғамасқа хақы да жоқ еді. Рас, бала кезінде заңгер болуды да армандаған. Сол себепті бала кезінен бос уақытын кітап оқумен өткізеді. Әсіресе, тарихи және деректі кітаптарды көп оқыған Төлеген Мағзұмұлы:
- Қазір технология күн сайын қарыштап дамып келе жатқан заман. Мен алғаш жұмысқа кірген кезеңде ешқандай техника жоқ еді, барлығын қолмен жасайтынбыз. Бүгін алпыс шақырым жерде отырсаң да, арнайы аппаратпен жұмыс барысын басқара беруге болады. «Білекке сенген заманда ешкімге есе бермедік. Білімге сенген заманда қапы қалып жүрмелік» деп Абылай хан айтқандай, жастарға тек білім алу керек деп ойлаймын. Себебі, «білімді мыңды жығады». Оқыған озатын кезеңде қапысыз қалған жарамас,-деп өзінің жастарға ақыл-кеңесін де жеткізді.
Мұнайшы Төлеген Машановтың осы салада табан аудармастан еңбек етіп келе жатқанына 45 жыл болыпты. Әкесінің ізін жалғаған ұлдың да еселі еңбегі еленіп, бұрынғы Энергетика министрі Б.Ақшолақов пен «Нұр Отан» партиясы аудандық филиалы төрағасының орынбасары Ү.Жақашевтың Алғыс хаттарымен, басқарма төрағасы С.Мыңбаевтың Құрмет грамотасымен марапатталды. «ҚазТрансОйл» АҚ Батыс филиалында ұйымдастырылған жазба ақындар мүшәйрасында ІІІ орынға қол жеткізіп, өзінің мұнаралы мұнайшы ғана емес, махаббат пен шабытқа толы сыршыл ақынжанды азамат екенін де байқатты. 1988 жылы өмірлік жары Нұрзипаш Нармағамбетовамен отау құрып, отбасылық өмірде де бақыттың бал құшағында тербелген екі қыздың ардақты әкесі. Қызы Айғаным да атакәсіпті жалғастырып, Құлсары мұнай құбырлары басқармасында лаборант болып қызмет атқарады. Өз ісінің хас шебері атанған Төлеген Машанов келер жылы зейнеткерлікке шығып, ұзақ жылғы еңбек бейнетінің зейнетін көрмек. Жүректегі білім мен қолдағы ептілікке сеніп, жұмыста жолбасшы, достыққа адал, ортаға сыйлы отағасы бола білген Төлеген ағамыздың өмір жолы – бүгінгі жастарға нақ үлгі-өнеге. Осы орайда атадан қалған даңғыл жолды жалғастырған даңқты мұнайшыға шалқар шабыт пен өлшеусіз бақыт тілейміз.
Е.АЛТАЙҰЛЫ
