Ұлттық қоғамдық сенім кеңесі жыл соңына дейін реформалардың келесі топтамасын әзірлейді. Бұл жайында Қазақстан Президенті Қасым-Жомарт Тоқаев informburo.kz ақпараттық-сараптамалық порталына берген эксклюзивті сұхбатында айтты, деп хабарлайды ҚазАқпарат тілшісі.
«Ұлттық қоғамдық сенім кеңесі мемлекеттік жүйемізді реформалау бойынша пайдалы ұсыныстарды түрлендіруге қабілетті кеңес ретінде өзін жақсы жағынан көрсетті. Саяси реформалардың бірінші топтамасының заң шығармашылық процесі басталып кетті. Экономикалық салада ауқымды іс атқарылып жатыр», деді Мемлекет басшысы.
ҚР Президенті осы жылдың соңына дейін Ұлттық қоғамдық сенім кеңесі реформалардың келесі топтамасын әзірлейтіндігін атап өтті.
«Мемлекеттік қызметшілерді жұмылдыру арқылы қауырт жұмыс жүргізіліп жатыр. Кеңеске мемлекетіміздің құрылысына өз үлесін қосуды қалайтын жаңа адамдар келгісі келеді. Олар: танымал заңгерлер, азаматтық белсенділер. Сондықтан таяу уақытта мен бұған дейін хабарлаған ауыс-түйіс жария етіледі»,- деді Қасым-Жомарт Тоқаев.
