Атырау облысының ПД Есірткі қылмысына қарсы іс-қимыл басқармасы салауатты өмір салтын насихаттау және зиянды әдеттерге, оның ішінде есірткіге қарсы иммунитетті қалыптастыру мақсатында Атырау сервис колледжінің студенттеріне эстафета ұйымдастырды.
Спорттық шараға студенттерден құралған 4 команда қатысты. Нәтижесінде, «Арман» командасы топ жарып, 1 орынды қанжығасына байлады. «Ұлан» командасы 2 орынды иеленсе, «Жігер» мен «Жалын» командасы 3 орынды иеленді. Жас спортшылар арнайы диплом және медальдармен марапатталып, оларға естелік сыйлықтар ұсынылды.
Іс-шара соңында Атырау облысы ПД Есірткі қылмысына қарсы іс-қимыл басқармасының жедел уәкілі полиция аға лейтенанты Қуандық Салешов жасөспірімдерге нашақорлық пен синтетикалық есірткінің зияны, оның қазіргі қоғамдағы кең таралуы және есірткінің заңсыз айналымына көзделген қылмыстық жауаптылық жөнінде ақпарат берді.
