Құқықтық тәртіп пен қоғамдық тыныштықты сақтау – біздің басты міндетіміз. Қазақстан Республикасы Ішкі істер министрлігі мен құқық қорғау органдары қазіргі таңда қала мен ауылдық жерлерде қауіпсіз орта қалыптастыру бағытында ауқымды жұмыс жүргізіп жатыр. Күн сайын еліміз бойынша 14 мыңнан астам полиция қызметкері мен Ұлттық ұлан сарбаздары патрульдік қызметке шығып, құқық бұзушылықтардың алдын алуға күш салып келеді.
Қызметтің нәтижесі бар: биылғы жылдың басынан бері көшелер мен қоғамдық орындарда жасалатын қылмыстардың саны айтарлықтай азайды. Қайталанатын құқық бұзушылықтарға тосқауыл қою, бұрын сотталған азаматтармен жұмыс жүргізу, сондай-ақ қару қолдану арқылы жасалатын ауыр қылмыстардың жолын кесу бағытында нақты іс-шаралар қолға алынған.
Бүгінде 15 мыңнан астам патрульдік маршрут құрылған. Бұл – бүкіл ел бойынша қауіп төнуі мүмкін учаскелерді толық қамтуға мүмкіндік беріп отыр. Министр Ержан Сәденов атап өткендей, қабылданған шаралардың арқасында жалпы қылмыс саны 13%-ға төмендеп, 10 мыңнан астам қылмыс ашылды, 10 миллионға жуық әкімшілік құқық бұзушылықтың жолы кесілді.
Біз үшін ең маңыздысы – халықтың сенімі мен тыныштығы. Сондықтан да Президенттің Жолдауындағы «Заң мен тәртіп» қағидасын берік ұстанып, әр азаматтың қауіпсіздігін қамтамасыз етуге бар күшімізді саламыз.
Сонымен қатар, қоғам тарапынан қолдау мен сергектік те аса маңызды. Қауіпсіздік – тек полицияның немесе әскери бөлім қызметкерлерінің емес, әр азаматтың жауапкершілігі екенін естен шығармаған абзал. Егер сіз күмәнді жағдайға тап болсаңыз немесе құқық бұзушылықты байқасаңыз – дереу құзырлы органға хабар бергеніңіз жөн-ақ.
Самет ҚҰЛАХМЕТОВ,
Қазақстан Республикасы Ұлттық ұланы 5546 әскери бөлімінің командирі, подполковник
