Махамбет ауданындағы Бала Ораз, Атамбаев, Есмахан және Көздіқара ауылдарында жалпы ұзындығы 65 шақырым болатын су құбыры желісінің құрылысы жүргізілді,- деп хабарлайды Өңірлік коммуникациялар қызметі.
Бала Ораз ауылында атқарылған жұмыстарды «Ел-Даму-Ырыс» ЖШС жүзеге асырды. Құрылыс барысында су айдау мұнарасы орнатылып, қоршаулар мен жарық шамдары қойылды. Сонымен қатар, ауылішілік су құбырлары тартылып, аумақ абаттандырылды.
— Есмахан және Атамбаев ауылдарындағы құрылыс жұмыстарын «Универсалстройсервис» ЖШС атқарды. Қос елді мекенде де су айдау мұнаралары орнатылып, ішкі су желілері тартылып, инфрақұрылым толық жаңартылды. Бұл жобалар — ауылдық инфрақұрылымды жақсартып, тұрғындардың өмір сүру сапасын арттыруға бағытталған маңызды қадам, – деді аудандық Құрылыс, сәулет және қала құрылысы бөлімінің басшысы Жігербек Төлеуғалиев.
Ал Көздіқара ауылындағы жобаны «Сұңқар Құрылыс LTD» ЖШС іске асырды. Бұл елді мекендегі жұмыстар да толық көлемде орындалды.
