Мен Құрылтайдың өткізілуін алға басқан қадам деп есептеймін, өйткені ол түрлі саяси көзқарастағы әлеуметтік топтар мен ұрпақтар өкілдерін біріктіруге арналған. Бұл шара қоғамдағы өзара түсіністік пен келісімнің символына айналуы тиіс.
Ұлттық құрылтай – қоғам мен мемлекет арасындағы ашық диалог алаңы, мұнда елдің дамуына қатысты маңызды мәселелер талқыланады. Оның барысында қоғамдық бірлікті нығайтуға және әртүрлі әлеуметтік топтардың мүдделерін теңестіруге бағытталған ұсыныстар мен шешімдер қабылданады.
Осындай ауқымды шараның өтетін орнын таңдау – елдің бай тарихы мен мәдени мұрасын бейнелейтін терең символдық қадам. Әрбір орын ерекше мағынаға ие, ол өткен мен бүгінді байланыстырып, болашаққа бағдар береді. Өткен жылы бұл іс-шара Атырауда өткізілсе, биыл ол Бурабайда – шексіз ормандары мен мөлдір көлдері аңыз бен жырға арқау болған өлкеде өтті. Құрылтайдың өткізілу орны туған жерге құрметпен қарау, дәстүрлерді қастерлеу және өркендеуге ұмтылу идеясын айқындайды. Әрбір отырыс тек саяси оқиға ғана емес, тарихқа құрмет көрсетудің белгісі әрі ұлттық бірегейлік пен мәдени кодты сезінуге серпін беретін маңызды қадам.
Маған педагог әрі тәлімгер ретінде Құрылтайда өскелең ұрпақтың тәрбиесіне көбірек көңіл бөлінгені маңызды. Биылғы жылды Жұмысшы мамандықтар жылы ретінде атап өтіп жатқанымызға өте қуаныштымын, бұл – болашаққа, жаңа буынға бетбұрыс жасаудың белгісі.
Ұлттық құрылтай Қазақстанның жаңғыруында маңызды рөл атқарады, өйткені ол елдің дамуына қатысты негізгі мәселелерді талқылау үшін белсенді азаматтарды, сарапшылар мен билік өкілдерін біріктіреді. Бұл – ұлттық бірлікті нығайтуға, әлеуметтік саясатты жақсартуға және экономикалық дамуға бағытталған стратегиялық шешімдерді әзірлеуге арналған аса маңызды алаң.
Өз сөзінде Қасым-Жомарт Тоқаев съезд мүшелерінің елді жаңғырту үдерісіне қосқан елеулі үлесін атап өтті. Бұл құрылтайдың өзектілігі мен маңыздылығын тағы бір мәрте айқындайды. Маған Ұлттық құрылтайдың қоғам мен мемлекет арасындағы диалог алаңы ретінде қалыптасқаны ұнайды. Бұл – елді басқарудағы ашықтық пен тиімділікті арттыру жолындағы маңызды қадам. Бүгінде Қазақстан халқы, ұлтына қарамастан, ел дамуына қатысты негізгі мәселелерге белсенді түрде қатыса алады.
Ашық пікір алмасу мен диалог қоғамның кең ауқымды топтарының мүдделерін ескеретін сындарлы шешімдер қабылдауға мүмкіндік береді. Дегенмен, Құрылтай ұсынымдары тек талқылау деңгейінде қалып қоймай, нақты мемлекеттік бағдарламалар мен бастамаларда көрініс табуы маңызды. Ұсынылған идеяларды жүзеге асыру және олардың орындалуын бақылау басты басымдықтардың бірі болуы тиіс. Құрылтай – билік пен қоғам арасындағы тағы бір коммуникациялық құрал. Мұнда қоғамдық пікір көшбасшылары, сарапшылар мен белсенділер бас қосады. Олар қоғамда қалыптасқан, бірақ нақты бастама ретінде толық пісіп-жетілмеген идеяларды ортаға салады.
Дәулет СӘЛІМОВ,
Қ.Дүтбаева атындағы Атырау гуманитарлық колледжінің «Мәдениет және өнер» бөлімінің меңгерушісі, Ы. Алтынсарин төсбелгісінің иегері
Фото: Ақорда
