Кондитер – жай ғана тәтті тағам дайындайтын адам емес. Ол – көңілге жылу, жанға қуаныш сыйлайтын өнер иесі. Әрбір торт, бәліш, шоколад немесе печенье – оның қолынан шыққан нәзік шеберліктің жемісі. Бала қуанышы, отбасылық той, үлкендерге арналған құрмет – бәрі де кондитер шеберлігінің арқасында ерекше мәнге ие болады.
Кондитер болу – дәлдік пен тазалықты, көркемдік пен төзімділікті талап ететін іс. Бір грамм артық қоспа немесе бірнеше секундқа асыққан сәт – тәттінің тағдырын өзгертіп жіберуі мүмкін. Сондықтан бұл мамандық – жауапкершілік пен жан қалауын қатар алып жүргендерге ғана бұйыратын ерекше жол.
Осындай шебер қол иелерін ұлықтау мақсатында 2025 жыл елімізде Жұмысшы мамандықтар жылы деп жарияланды. Бұл – нақты іспен елге қызмет етіп жүрген жұмысшы мамандарға берілген үлкен құрмет. Кондитер де – сол еңбек адамдарының қатарындағы асыл мамандықтың иесі.
Гүлдана СӘДУАҚАСОВА,
Махамбет ауданы
