«KomekAtyrau» қоғамдық бірлестігі дәрігерлерге ыстық тамақ таратты

(0 Votes)

Атырауда «KomekAtyrau» қоғамдық бірлестігі дәрігерлерге күнделікті  тегін 100 ыстық тамақ жеткізуде, деп хабарлайды Атырау облыстық коммуникациялар қызметі.

Адам жанының арашасы болған жандардың көңілін ауламақ ниетте жасалған игі іске атыраулықтар мен жергілікті кәсіпкерлер қолдау көрсетіп, қаражат жинаған. Бүгінде  ұйымдастырылған акция аясында 650 медицина қызметкеріне ыстық тамақ берілді. Қайырымдылық шараға   мұрындық болған «KomekAtyrau» қоғамдық бірлестігінің жетекшісі Еркебұлан Серікқалиевтің айтуынша, ыстық тамақ облыс орталығындағы медициналық мекемелерге кезекпен жеткізілуде.

 - Кейде өзіміз қарбалас кезеңде түскі ас ішуді ұмытып кетіп жатамыз. Ал,  індетпен күресіп жатқан осындай қиын кезеңде дәрігерлердің тамақ туралы ойлауға уақыттары да жоқ. Десе де, оларға күш керек, халықтың қолдауы да аса маңызды. Сол себепті бұл бастаманы жүзеге асырып отырмыз. Бүгін акциямыздың алтыншы күні,-дейді Еркебұлан Серікқалиев.

Айта кетейік,  осыған дейін облыс тұрғындары мен жергілікті кәсіпкерлердің қолдауымен «KomekAtyrau» қоғамдық бірлестігі 300 отбасын тамақпен қамтамасыз етті. Сондай-ақ, 2 мүмкіндігі шектеулі жанның отбасына және  шалғай ауылдардағы әлеуметтік аз қамтылған отбасыларға қаржылай көмек көрсеткен.

depti.kz

Мақат тынысы

COVID 19

covid