Қазақстанда ауқымды "Келешек" (Жайлы мектеп) білім беру жобасы іске қосылды. ҚР Оқу-ағарту министрі Ғани Бейсембаевтың айтуынша, бұл бастама арқылы алғаш рет елімізде білім сапасын барлық балалар үшін тең етуге мүмкіндік туып отыр, деп хабарлайды Tengrinews.kz.
Үш ауысым мен сыныптардың шамадан тыс толуы қалай шешіледі?
Министрдің айтуынша, елде алғаш рет бірыңғай білім беру кеңістігі қалыптасуда. Бұл ауыл мен қала мектептерінің арасындағы алшақтықты жоюға бағытталған.
"Мұнда таңдаулыларға арналған мектептер жайлы сөз емес. Бұл – баршаға ортақ жаңа норма", – деп атап өтті министр.
Жоба аясында мектептердің архитектурасы, жабдықталуы мен оқыту әдістемелері біркелкі және жоғары стандарттарға сай болады.
Бейсембаевтың айтуынша, "Жайлы мектептерде" жиһаздан бастап жарыққа дейін бәрі мұқият ойластырылған. Кең сыныптар, демалыс аймақтары, заманауи санитарлық тораптар – барлығы балаларға тек білім алу ғана емес, мектепте жайлы болу үшін жасалған.
"Оқушы мектепте өзін үйдегідей сезінсе, оның оқу мотивациясы да артады", – дейді министр.
Қауіпсіздік мәселесі
Әр мектеп бейнебақылау жүйесімен, кіруді бақылау жүйесімен толық жабдықталған. Сонымен қатар, кіші және жоғары сынып оқушылары мектеп ішінде бөлек блоктарда оқиды – бұл олардың қауіпсіздігі мен жайлылығы үшін маңызды.
IT, шеберханалар және сыни ойлау
Жаңа мектептер – тек ғимарат пен парталар ғана емес. Бұл – зертханалар, робототехника кабинеттері, шеберханалар, дейді министр.
Мұнда оқушылар бағдарламалау, зерттеу жүргізу, командамен жұмыс істеу дағдыларын меңгереді.
"Бала жай ғана дәріс тыңдамайды – ол жоба жасап, талқылап, тәжірибе жүргізеді. Бұл мүлде басқа деңгейдегі білім беру үдерісі", – дейді Ғани Бейсембаев.
"Адал Азамат" – адалдық пен жауапкершілік құндылықтары
Министрдің айтуынша, жаңа мектеп тек білім ғана емес, құндылықтарды да қалыптастырады. 1-сыныптан бастап оқушыларға адалдық, еңбекқорлық, құрмет секілді адамгершілік қасиеттер үйретіледі.
"Біз өз шешіміне жауап бере алатын, адал және әділ ұрпақ өсіргіміз келеді. Бұл – "Адал Азамат" бейнесі", – деп түсіндірді министр.
Кәсіби бағдар – бастауыш сыныптан бастап
Оқушылар мектеп қабырғасынан бастап түрлі рөлдерді байқап көреді: жобалық апталарға қатысады, маман иелерімен кездеседі, 7-сыныпта тәлімгермен бірге жеке даму жолын қалыптастырады. Мектепті аяқтағанға дейін оқушы өз болашағын анық біледі.
Жаңа буын ұстаздары мен директорлары
"Мектепті өзгертудің жолы – алдымен мұғалімді өзгерту", – дейді министр.
3000-нан астам мұғалім жаңа әдістемелер бойынша оқытылып, бұл жұмыс жалғасуда. Жаңа форматтағы мектептерге "Өзгеріс көшбасшылары – 1000 директор" бағдарламасына қатысқан, жаңа көзқарастағы басшылар жетекшілік етеді.
"Келешек мектептері" – болашақтың мектебі
Министр жаңа форматтағы мектептерге "Келешек мектептері" деген ортақ атау беруді ұсынды. Бұл атау олардың миссиясын нақты сипаттайды – балаларға тең мүмкіндік беру, елдің болашағын күшейту.
"Заманауи мектеп – сәнді тақта мен гаджеттер туралы емес. Бұл – болашақ сын-қатерлерге дайын ұлт туралы", – деп қорытындылады Ғани Бейсембаев.
Жоба аясында 740 мың оқушы орнымен қамтамасыз ететін 369 мектептің құрылысы көзделген.
