20 қыркүйек күні Доссор мәдениет үйінде аудандық мәдениет, тілдерді дамыту, дене шынықтыру және спорт бөлімінің ұйымдастыруымен қарымды қаламгер, соғыс және еңбек ардагері, ауданның «Құрметті азаматы», «Мұнайшы» газетінің редакторы Тәжібай Текеевтің туғанына 100 жыл толуына орай, «Мұнай иесі» атты еске алу кеші өтті.
Шара қаламгердің өмір жолы мен шығармашылығына арналған видеоролик тамашалумен басталды. Кейін аудан әкімінің орынбасары Е.Ермағамбетов сөз алып, марқұмның отбасына естелік сыйлық табыстады.
Кейін сахна төріне көтерілген шәкірттері С.Мұхамбетов, Қ.Сұлтанғалиев, М.Қуатбаев өздерінің жүрек жарды естеліктерімен бөлісіп, облыстық ардагерлер кеңесінің «Тәлімгерлік медалін» ұрпақтарына табыс етті.
Кеш барысында Доссор мәдениет үйі жанындағы драма үйірмесінің оқушылары қаламгердің өлеңдерін нақшына келіп оқыды. Сондай-ақ аудандық архив филиалы ұжымы тақырыптық стенд жасақтап, қаламгердің архивке тапсырылған жеке тектік құжаттарымен, мақалаларынан көрме ұйымдастырды.
Ұрпақтары болса шараны өткізуге мұрындық болған аудан әкімдігіне алғысын білдіріп, әкелерінің көзін көрген әріптестеріне шапан жапты.
Өз тілшіміз
