«Теңізшевройл» компаниясының әлеуметтік инвестициялар бағдарламасы Атырау облысында адамдардың өмірін жақсартуды жалғастыруда.
ТШО қолдауымен жүзеге асырылып жатқан маңызды жобалардың бірі – «Болашақ К» қоғамдық қоры жанындағы оңалту орталығы. Ол қозғалыс және өзіне-өзі қызмет көрсету мүмкіндігі шектеулі балалар мен ересектерге көмек көрсетеді.
Мұнда инсульт алған пациенттер, омыртқа мен жұлын зақымданғандар, бас миына зақым келгендер, церебралдық сал ауруы (ДЦП) бар балалар, сондай-ақ аутизм және психо-сөйлеу дамуының кешігуі бар балалар қолдау алады.
Орталық менеджері Зарина Бектенованың айтуынша, қазіргі кезде пациенттермен мультидисциплинарлық команда жұмыс істейді: невролог, реабилитолог, ЛФК инструкторы, сенсорлық интеграция маманы, логопед, дефектолог және психологтар.
Өткен жылы «Болашақ К» әлеуметтік кәсіпорын ретінде тіркеліп, мемлекеттік қолдау тізіліміне енгізілді және грантқа ие болды. Алынған қаржыға орталық жаңа жабдықтар сатып алып, заманауи технологияларды енгізді және қызмет спектрін кеңейтті. Олардың қатарында — биорезонанстық терапия, биоэнергетикалық массаж, онлайн-оңалту және ата-аналарға арналған оқыту семинарлары бар.
Сонымен қатар жаңа жұмыс орындары ашылды: командаға психолог, логопед-дефектолог және диагност қосылды. Орталық 1 айдан 18 жасқа дейінгі балаларды қабылдайды, сондай-ақ операциялар мен аурулардан кейін қалпына келуге мұқтаж ересектерге де қызмет көрсетеді.
ТШО әлеуметтік инвестициялар бағдарламасы 2010 жылдан бері жергілікті ҮЕҰ арқылы жүзеге асырылып келеді, бұл коммерциялық емес секторға өз жобаларын ұсыну және жүзеге асыруға мүмкіндік береді. 2024 жылы бағдарламаның бюджеті \$1,3 млн құрады, 15 жоба іске асырылды — мерзімінен бұрын туылған балаларды оңалтудан бастап, инклюзивті білім беру бойынша педагогтарды дайындау және әйел кәсіпкерлерді қолдауға дейін. Мұндай тәсіл жергілікті қауымдастықтарды белсенді қатысуға тартып, жобаларды тұрақты етеді.
Биылғы жылы жергілікті және республикалық деңгейдегі 20 жоба жүзеге асырылуда.
