Облыстағы 352 ауылдық елді мекеннің 232-сі ғана орталықтандырылған ауызсуға қосылған. Жүздеген ауылдың халқы кешенді блок-модульдер мен ұңғымалардың суын тұтынып отыр.
Ертіс-Баян жерінің ауылдарында ауызсу тарифі – әркелкі. Соңғы жасалған талдау қорытындысы бойынша Успен ауданында ауызсудың ең арзан тарифі тіркелген, текше метрі – 51,78 теңге. Ең қымбаты Ақсу қаласының ауылдық аймағында, текше метріне бекітілген тариф – 343,6 теңге.
– Облыста ауызсудың орташа тарифі 185,5 теңгені құрайды. 92 ауылда кешенді блок-модульдер орнатылған, 4 елді мекенде топтық су құбыры бағаналары бар. Қалған 24 ауыл ұңғымалардағы суды пайдаланып отыр, – деп мәлімдеді Павлодар облысы энергетика және тұрғын үй-коммуналдық шаруашылығы басқармасынан.
Былтыр 37 мыңнан астам халқы бар 44 ауылға жаңа су құбырлары тартылған. Осылайша, облыстағы ауыл тұрғындарының 98%-ына таза ауызсу жеткізілген. Биыл ауылдық жерлерде 32 инвестициялық жоба жүзеге асырылып жатыр. Басым бағыттар – жолдарды, сумен жабдықтау нысандарын салу. Жыл соңына дейін 6 су құбырының құрылысы аяқталып, облыстағы ауыл халқын 100% таза ауызсумен қамту жоспарланған.
Облыстық санитарлық-эпидемиологиялық бақылау департаментінің мәліметінше, былтыр орталықтандырылған, оқшауланған ауызсу көздерінен 1559 сынама алынып, оның 62-сінде микробиологиялық, санитарлық-химиялық көрсеткіштер нормаға сай болмай шыққан. Департамент мамандары аудан-қалалардың әкімдеріне, ауызсумен қамту мекемелеріне су құбырларын үнемі шайып, сүзгілерді ауыстырып отыру керектігін
ескертеді.
Павлодар облысы
