2025 жылғы 13 шілдеде еліміздің бірқатар өңірінде ауыл әкімдерін тікелей сайлау науқаны өтуде. Атырау қаласына қарасты Қайыршақты ауылдық округінде де сайлау белсенді түрде жүргізілуде.
Аталған округтегі №265 сайлау учаскесі таңғы сағат 07:00-де ашылып, заңға сәйкес жұмысын бастады. Жалпы 1305 сайлаушы тіркелген. Олардың қатарында 23 жас – 18 жасқа енді толған сайлаушылар бар. Бұл – саяси өмірге алғаш қадам басып жатқан жастар үшін маңызды тәжірибе.
Сондай-ақ, 14 мүмкіндігі шектеулі азаматқа арнайы жағдайлар жасалып, дауыс беру еркіндігі қамтамасыз етілген.
Қайыршақты ауылдық округі әкімдігіне екі кандидат тіркелген. Тұрғындар өз таңдауын жасап, ауылдың болашағына бей-жай қарамай, жауапкершілікпен дауыс беруде.
Сайлау барысы учаскелік комиссия өкілдері мен тәуелсіз бақылаушылардың жіті назарында.
Сайлау учаскесі кешкі сағат 20:00-ге дейін жұмыс істейді. Сондықтан әрбір дауыс – ауылдың келешегі үшін маңызды. Өз таңдауыңызды жасап, белсенділік таныту – азаматтық борыш.
Ақтілек Базарбаева
