Республика күні қарсаңында «KAZENERGY» Ассоциациясының ұйымдастыруымен отандық мұнайгаз өндіруші және энергетика саласындағы компания қызметкерлерін ұлықтауға арналған шара өтті.
Салтанатты жиын барысында «KAZENERGY» Ассоциациясының төрағасы Тимур Құлыбаев аталмыш салалардың өндірістік және әлеуметтік дамуына үлес қосқан жұмысшыларды мемлекеттік наградалармен марапаттады. АМӨЗ бас директорының өндіріс жөніндегі бірінші орынбасары- бас инженері Рахымжан Жанғабылов «Ерен еңбегі үшін» медалін иеленді. АМӨЗ-дің «Орталық зауыт зертханасы» сынақ орталығы басшысының орынбасары Сәния Меңдібаева III дәрежелі «Еңбек даңқы» орденімен марапатталды.
Мерекеге орай Атырау облысының әкімдігі ұйымдастырған салтанатты іс-шарада аймақ басшысы Серік Шәпкенов АМӨЗ-дің хош иісті көмірсутектер өндірісінің технологиялық қондырғы машинисі Рахмет Түсіповке ІІІ дәрежелі «Еңбек даңқы» орденін табыстады.
Атырау мұнай өңдеу зауытында да мерекеге орай салтанатты жиын өтті. Бас директор Мұрат Досмұратов жиналғандарды ұлттық мерекемен құттықтап, кәсіпорынның бірқатар жұмысшысына төс белгілер мен грамоталар табыстады.
АМӨЗ басшысы құттықтау сөзінде тәуелсіздігіміз ұлықталатын Республика күні мерекесінің еліміздің тарихында алатын орны туралы айтты. Аумалы-төкпелі заманда елдің берік іргесін сақтай отырып, саяси-экономикалық және мәдени-әлеуметтік дамудың маңыздылығын атап өтті. Мұрат Досмұратов сондай-ақ ұлттық экономиканы өркендетуде АМӨЗ-дің атқаратын айрықша рөліне тоқталды.
«Зауытта жүріп жатқан жөндеу-алдын алу жұмыстары технологиялық құрылғылардың жұмысын жақсартып қана қоймай, өндірісті экологиялық тұрғыдан таза, экономикалық тұрғыдан тиімді жүргізуге септігін тигізеді. Бұл мақсаттарға жету үшін ұжымдағы әр қызметкердің табысты жұмысы маңызды. Зауытың білікті кадрлары өз қызметтерінде заманауи технологияларды кеңінен пайдалануда. Сондықтан, кәсіпорынның ел экономикасына қосатын үлесін арттыруға бағытталған жоспар орындалады деп сенемін», - деді зауыт басшысы.
Ресми кезеңнен кейін Мұрат Досмұратов еселі еңбегімен ерекше көзге түскен зауыт жұмысшыларына төсбелгілер табыстады. Атап айтқанда, гидрогенизациялық процестер өндірісі каталитикалық крекинг нафтасын іріктеп сутектендіру қондырғысының бастығы Абат Ислямов «Самұрық-Қазына» АҚ мерекелік төсбелгісімен наградталды. Гидрогенизациялық процестер өндірісінің технологиялық қондырғы операторы Бексұлтан Дүйсенғұл «ҚазМұнайГаз» ҰҚ» АҚ естелік белгісімен марапатталды. Хош иісті көмірсутектер өндірісінің технологиялық компрессорлар машинисі Қанат Кубиев пен мұнай өнімдерін өндіру және тасымалдаудың тауар операторы Аманқос Джайлаубаев «ҚазМұнайГаз» ҰК» АҚ «Құрмет грамотасын» иеленді.
Іс-шара соңында АМӨЗ-дің бастауыш кәсіподақ төрағасы Ғалымжан Амантурлин жиналғандарды мерекемен құттықтап, зор денсаулық пен табысты жұмыс тіледі.
Баспасөз қызметі
