ҚР Президенті Қасым-Жомарт Тоқаевтың Жарлығымен «2025 жыл – Жұмысшы мамандықтары жылы» деп жарияланды. Бұл бастама, жұмысшы мамандықтарын дәріптеу арқылы қоғамда еңбекқорлық және кәсіби маман болу қасиеттері жоғары бағалануына, жастарды осы салаға тартуға, еңбек нарығында сұранысқа ие мамандықтар бойынша білікті кадрларды даярлауға бағытталған.
Адал әрі табанды еңбегімен табысқа жеткен, сол арқылы құрметке бөленген аға ұрпақтың ел дамуына қосқан үлесін бағалап, үлгі тұту жұмысшы мәртебесінің көтерілуіне де ықпалды. Аудан өңірінде бұл талапқа өткен өмірі толық сай келетін нәзікжандылар бар. Қалекеева Күләш Рахманқызы Теңіз ауданы, «Красная Армия» ауылында (қазіргі Құрманғазы ауданы, «Жаңа ауыл») 1939 жылы 13 наурызда дүниеге келген. Әкесі Рахман. Анасы Қоңырша. Ата-анасынан өрбіген Қанша, Насихат атты әпкелері, Алпысбай есімді інісіне Күләш алабөтен бауырмал болған, қамқорлығын аямаған.
Балалық шағы мен жастық кезеңі 1941-1945 ж.ж. Ұлы Отан соғысымен, соғыстан кейінгі жылдардағы шаруашылықты қалпына келтірудегі қоғамдағы қиындықтармен тұспа-тұс келгендіктен, Күләш тұрмыстық жағдайы салдарынан сол кездегі өз замандастары сияқты бастауыш негізде білім алып, одан әрі жалғастыру мүмкіндігі болмаған.
Жас кезінен домбырамен халық әндерін тамылжыта орындап, талай аудандық, облыстық сайыстарға қатысқан. Ол кезде, ауылда домбыра да, домбырамен дәстүрлі әндерді айтушылар да сирек кездесетін. Жас та болса, Күләштің ұлттық құндылықтарымызды дәріптеудегі еңбегі осылай басталған.
1950 жылдары Алматы қаласында дәстүрлі әндерді насихаттау мақсатында өткізілген республикалық фестивальға қатысып, жүлдегер атанған. Облыс, аудан мерейін асқақтатқан. Талантты жас домбырашы Алматыдағы өнер ордаларынан жұмысқа шақырту да алған (алайда, анасының ұйғарым-тілегін аттап кете алмаған).
Атап өткен жөн, Күләш Рахманқызының ата-әжесі де әмбебап домбырашылар екен. Жас кездерінде ата-әжесі де домбыра тартып, өзгелермен сайысқа түседі шамасы. Ал, өзара сайысқа түскен кезде жеңіс байрағын иелену үшін атасы сайыс соңында домбыраны аяғының башайларымен тартып, жеңіске жеткен. Ал, әжесі нәзікжандыға тән әдеп-ибасын сақтап, аяғын жалаңаштай алмаған. Кейіннен өнерлі жастар отау құрыпты. Демек, Күләш Рахманқызының өнері де табиғи таланттан, ата-тегінен дарыған.
Жас Күләш еңбек жолын 1955 жылдан «Красная Армия» ұжымшарында түрлі шаруашылық жұмыстарында істеп бастаған. 1958 жылдан балықшы болған.
Еңбектегі жоғары көрсеткіштеріне сәйкес 1958-1959 жылдары Гурьев облыстық партия конференцияларына делегат болып қатынасқан. 1960 жылы балықшы Қалекеев Әбубакармен отбасын құрған.
Социалистік жарыс жеңімпазы әрі қоғамдық жұмыстағы белсенділігі ескеріліп, ауылдық, аудандық кеңестердің, ал 1982 жылы Гурьев облыстық кеңесінің депутаты болып сайланған. Звено жетекшісі жұбайы Қалекеев Әбубакармен бірге жыл сайын «Мокрий» тартымында көктемгі-күзгі балық аулау науқанында еңбек еткен. Ал 1979-1989 жылдар аралығында он жыл бойы Гурьев қаласының іргесіндегі «Жұмыскер» елді мекені тұсында сәуір-мамыр айларында балық аулау тартымында жұмыс жасаған. Яғни, көктемгі балық аулау науқаны облыстан ауданға бөлінген, бекіре тұқымдас аулау лимиті негізінде «Жұмыскер» елді мекені тұсында жүргізілген еді.
Күләш Рахманқызы өмір бойы үйден тысқары жүріп, су айдындарында жыл мезгілінің құбылмалы кезеңдерінде де (дауылды жел, нөсерлі жауын, сүйектен өтер күзгі суық, т.с.с.) балық аулау тартымдарында күні-түні табанды төзімділікпен жанкешті жұмыс жасаған ана.
«Мокрий» тартымына жас балаларын апарып, жұмыс арасында бас-көз болып, бағуға да мәжбүр болған («Бала кезімізде, ата-анамыз балықшылармен бірге кейде таңда не кешке қарай балық аулауға кеткенде орман ішіндегі уақытша баспанада қалған біз үрейленіп елегізитінбіз» деп еске алады ұрпақтары).
Ерлі-зайыпты Қалекеевтердің «Красная Армия», кейіннен Ленин атындағы ұжымшарлардың, ауданның экономикасын дамытуға үлес қосып, бесжылдық жоспарларын үнемі асыра орындаған Социалистік жарыс жеңімпаздары тұрғысындағы еңбектері бағаланып, озат балықшылар қатарында 1974 жылы Ю.Манашев «Орал-Каспий байлығы» атты деректі фильм түсірген (сценарий жазған Ғ.Шалахметов). Сонда А.Қалекеевке Ауыспалы Қызыл Ту тапсырылған сәт те көрініс тапқан.
Зейнетке Ленин атындағы ұжымшардан шыққан Күләш ана, «Еңбек ардагері» медалінің иегері. Аудан әкімінің, облыстық мәслихат төрағасының алғыс хатымен марапатталған.
Балықшы ана ақынжанды да. «Өшпейді ерлер аты есімізден» , т.б. көптеген өлеңдері кезінде аудандық «Серпер» газетінде жарияланып тұрған.
Күләш Рахманқызы азаматын ардақ тұтып, туыстарын құрметтей білген. Азаматымен бірге ұрпақтарының жоғары білім алуына қолдау көрсетіп, ұлын ұяға қондырып, қызын қияға ұшырған бақытты ана.
Азаматы Әбубакар Бисембіұлы 2011 жылы дүниеден озса да қара шаңырағының туын тіктеп, құт-берекелі шаңырақта ұрпақ қызығына бөленуде. Немере-жиендерінің мейірбан әжесі. Ақжарқын, қайырымды, ағайын-туыс, құда-жекжатқа, көршіге сыйлы, ұлағатты жан.
Отбасының Бақыт, Сағид, Мариям, Баян, Сағидолла, Эльмира атты перзенттерінен абыройлы ұрпақтары өрбіген. Қара шаңырақта ұл келіні Сағидолла-Ләззат.
Құрманғазы ауданында балық шаруашылығының дамуы мен өркендеуіне, өлшеусіз үлес қосқан ардагер балықшы анамыздың қажыр-қайрат, адал еңбегімен өткен ерен еңбек жолы осындай. Балықшы анамыз әрі шоқтығы биік дәстүрлі әндерді домбырамен орындап, насихаттаған талғамы биік өнерпаз.
Зерек Сағыпазова,
мемлекеттік қызмет саласының ардагері, «Өренді өлкетанушы» клубының мүшесі
