Бүгін 11 маусым күні ауданда алғаш рет мектеп оқушыларына арналған «Айбын» шатырлы әскери-патриоттық лагері жұмысын бастады. Доссор кентіндегі Байбақты ата бағында ұйымдастырылған орталық балаларды әскери өмірдің қыр-сырын меңгеруге баулиды.
Лагерьдің ашылу салтанатына аудан әкімінің орынбасары Хайдар Төлеуішов қатысып, жаңа жобаға сәттілік тілеп, ұйымдастырушылар мен қатысушыларды құттықтады.
Әскери-патриоттық лагерь 11-20 маусым аралығында екі ауысыммен өткізіледі. Әр ауысымның ұзақтығы 5 күннен тұрады. Бұнда 40 ер бала он күн бойы әскери өмірге машықтанатын болады. Алғашқы ауысымда Доссор кенті мектептерінің 20 оқушысы болса, маусымның 15-і күні бұл жасақты Мақат кентінің 20 оқушысы алмастырады.
«Айбын» шатырлы әскери-патриоттық лагерінің күн тәртібі тура әскердегідей. Ұйқыдан тұру, жуынып-шайыну, дене шынықтыру, таңғы ас ішу, қала берді саптық және атыс дайындығына кірісу – бәрі де жарғыдағы ережеге сай ұйымдастырылады.
М.ІЗТҰРҒАНОВА,
суреттер автордікі