«Заң мен тәртіп» дегенде көп жағдайда полицияның жұмысы еске түседі. Алайда көшедегі тыныштық пен қауіпсіздік тек құқық қорғау органдарының қызметіне байланысты емес. Қоғамдық тәртіп әр азаматтың өз әрекетінен басталады. Жол ережесін сақтау, қоғамдық орында айналаға кедергі келтірмеу, бөтеннің мүлкіне қол сұқпау, өзгенің құқығын құрметтеу – мұның бәрі заңға деген көзқарасты көрсетеді. Сондықтан тәртіпті тек полиция қамтамасыз етуі тиіс деген түсінікпен келісу қиын.
Атырауда да қоғамдық қауіпсіздік мәселесінде тұрғындардың жауапкершілігі маңызды. Құқық бұзушылықтың алдын алуға қатысатын азаматтарды ынталандыруға арналған тетіктердің енгізілуі де қоғамның бұл іске араласуы қажет екенін көрсетеді. Егер тұрғындар күмәнді жағдайды көріп тұрып үнсіз қалмаса, құқық бұзушылыққа жол бермеуге атсалысса, қауіптің алдын алу әлдеқайда тиімді болар еді. Заң талаптарын сақтау үшін әр адамның полиция қызметкері болуы міндетті емес, азаматтық жауапкершілігі болса жеткілікті.
Меніңше, заң мен тәртіпті құрметтеу күнделікті әдетке айналуы керек. Полиция заң бұзылғаннан кейін әрекет етеді, ал азаматтың саналы әрекеті сол заң бұзушылықтың алдын алуы мүмкін. Сондықтан қауіпсіз Атырау қалыптастыру тек мемлекеттік органдардың емес, қала тұрғындарының да ортақ міндеті. Тәртіп көшеде патруль жүрген кезде ғана емес, патруль жоқ кезде де сақталса, оның мәні сонда.
Ерлан Қалиев, Атырау қаласы.
