Бүгін таңертеңнен бастап Оқушылар сарайында Көкжайлау шатқалында Almaty Superski тау курортын салудың қоршаған ортаға ықтимал әсері туралы есеп бойынша қоғамдық тыңдаулар өтіп жатыр. Іс-шараны жеке меншік Kazakh Tourism Development Ltd. компаниясы ұйымдастырды.
Almaty Superski жобасы Көкжайлау шатқалы мен Құмбел шыңы аумағында жалпы ұзындығы 65 шақырымнан асатын тау шаңғысы инфрақұрылымын дамытуды көздейді. Бұған дейін жоба өткен жылдың мамыр айында Премьер-министр Олжас Бектеновке жабық форматта таныстырылған болатын. Ал курорттың жаңартылған жоспары 2025 жылдың қыркүйегінде бекітілген.
Тыңдау барысында залда жобаны қолдап келген жастар да болды. Олар қолдарына арнайы плакаттар ұстап, Алматыдағы тау кластерін дамыту мен жаңа туристік инфрақұрылым салу бастамасын қолдайтындарын білдірді.
Жастар өкілдерінің айтуынша, тау курорттарын дамыту Алматыны халықаралық туристік деңгейге шығарудың маңызды қадамы саналады. Қатысушылардың бірі:
«Алматының таулары — біздің басты табиғи брендіміз. Егер инфрақұрылым дұрыс дамытылса, қала әлемдегі ірі курорттармен бәсекелесіп, дүниежүзінен турист тарта алады», – деді.
Басқа қатысушылар да жобаның тек туризмге ғана емес, ел имиджіне де әсер етуі мүмкін екенін атап өтті.
«Қазақстан үшін заманауи инвестицияларға ашық екенімізді және әлемдік деңгейдегі инфрақұрылымды дамытуға қабілетті екенімізді көрсету маңызды. Мұндай жобалар еліміздің туристік бағыт ретіндегі беделін қалыптастырады», – деді олар.
