Білім беру сапасын арттыру және оқушыларға қолайлы орта қалыптастыру мақсатында жүзеге асырылып жатқан «Келешек мектептері» ұлттық жобасы Атырау облысының білім саласына жаңа серпін берді. Жоба аясында өңірде заманауи талаптарға сай жаңа мектептер салынып, оқушылардың сапалы білім алуына мүмкіндік жасалуда.
Мемлекет басшысы Қасым-Жомарт Тоқаев білім мен ғылымды дамытуға ерекше мән беріп келеді. Президенттің бастамасымен жүзеге асырылып жатқан ұлттық жоба білім беру инфрақұрылымын жаңғыртып, балаларға заман талабына сай білім алуға жағдай жасауды көздейді.
Атырау облысында соңғы жылдары халық санының өсуіне байланысты жаңа мектептерге деген сұраныс артып келеді. Осы мәселені шешуде «Келешек мектептері» жобасының маңызы зор. Жаңа білім ордалары оқушы орындарының тапшылығын азайтып қана қоймай, білім беру сапасын арттыруға да ықпал етуде.
Заманауи мектептерде STEM кабинеттері, робототехника сыныптары, зертханалар, кең спорт залдары мен шығармашылық бағыттағы үйірмелерге арналған арнайы кабинеттер қарастырылған. Мұндай мүмкіндіктер оқушылардың жан-жақты дамуына, жаңа технологияларды меңгеруіне және өз қабілеттерін шыңдауына жол ашады.
Бүгінде Атырау қаласында пайдалануға берілген жаңа «Келешек мектептері» жүздеген оқушыны қабылдап, сапалы білім беру ісіне өз үлесін қосып келеді. Мұнда балалар қауіпсіз әрі жайлы ортада білім алып, шығармашылық және зияткерлік қабілеттерін дамытуға мүмкіндік алуда.
Ұлттық жобаның тағы бір маңызды тұсы – қала мен ауыл арасындағы білім сапасының алшақтығын азайту. Заманауи мектептердің салынуы өңірдегі барлық оқушыға тең мүмкіндік беруге бағытталған.
«Келешек мектептері» – бұл тек жаңа ғимараттар емес, ел болашағына салынған инвестиция. Сондықтан жобаның нәтижесі алдағы жылдары өңірдің білім сапасын арттырып, бәсекеге қабілетті ұрпақ тәрбиелеуге негіз болары сөзсіз.
Н. Насыр
